Дойдукова Розалия Дмитриевна 1946 с. Дойдукова Ульяна Ивановна дьиэ кэргэнигэр төрөөбүтэ. Дүллүкү оскуолатыгар үөрэнэ сылдьан комсомолга киирбитэ. 1965 с. Якутскайдааҕы сельхозтехникумҥа үөрэнэ киирэр. 1969 с. үөрэнэн бүтэн, агроном идэтин ылар. 1969-70 сс. Кэнтиккэ И. Барахов аатынан совхозка агрономунан үлэлиир. 1970 с. партияҕа киирбит уонна Үөдүгэй нэһилиэгэр совет председателинэн үлэлиир. 1972 с. сельхозтехникумҥа 2 сыл комсомол секретарынан, Хороҕо оҕуруот биригэдьииринэн биир сыл үлэлиир.

1975 с. Хомустаахха ананан кэлэр уонна Василий Дойдуков аатынан ыччат-комсомольскай ферматыгар биригэдьииринэн 10 сыл үлэлиир. 1976-77 сс. үүт ыаһыныгар, сүөһүнү төлөһүтүүгэ үрдүк көрдөрүүнү ситиһэн Российскай ЦК Комсомола Почетнай грамотатынан наҕараадаланар, үйэ- саас тухары хаалар Кыһыл знамяны ылар.

1980-85 сс. 10-с ыҥырыылаах Верховнай Совет депутатынан талыллар. 1983-87 сс. Высшай партийнай оскуоланы үөрэнэн бүтэрэр. Дүллүкүгэ парткомунан үлэлиир.